勇闖曱甴屋爆紅　黃穎君離巢轉職月薪逾6萬政府工

無綫節目《東張西望》主持黃穎君近日因勇闖大埔富亨邨「曱甴屋」，獲封「東張女勇士」，不過原來「曱甴屋」報道係其告別作，呢日竟有消息指原來黃穎君已經離巢，而畢業於香港大學教育系學士、中文大學社會系碩士嘅佢，更轉職擔任民政事務局媒體主任，月薪高達6萬7千多元，今日（8日）佢就喺社交網大晒派散水餅嘅照片，親證離開《東張》消息。

黃穎君接受東網訪問，指主持《東張》激發其使命感，希望以另一個身份為社會作更多貢獻：「《東張》畀咗一份使命感我，令我開始諗仲可以做啲咩嘢，改變到社會氣氛，所以就諗不如從根本入手，了解吓政府方面有咩範疇，自己有咩能力做到更好，喺唔同嘅崗位上，繼續關注社會嘅問題，真係可以幫到手。自己都入咗行10年，TVB已經畀咗個好好嘅老公我，已經好心滿意足。」至於問到係咪考慮咗好耐先決定離巢，佢就表示一切都係機緣巧合：「係有朋友見到呢個職位，覺得好啱我，叫我去試吓。嗰陣都冇好認真話一定要得，只係膽粗粗試吓，冇諗過真係可以加入到政府。」