女神舒淇執屋大掃除　家居擺設終極曝光

女星舒淇為咗同老公馮德倫一齊過新年，早排已經返咗香港，近日更要履行賢妻責任，進行大掃除之餘，都不忘拍低執屋時嘅混亂情況。佢留言：「快過年了，整理屋子未？ 這一區我整理了兩小時，怎麼感覺沒理過。」佢拍低客廳一角，見到家中嘅布置十分樸素，完全同大家心目中「女星香閨」係天與地嘅距離，電視機櫃都係平實貨色之餘，仲見到櫃面舒淇個金像獎獎座，混雜咗喺堆雜物如咖啡壺、遊戲機等入面。而電視機櫃旁邊有幾級樓梯，全部都係堆滿鞋盒。雖然呢個女星舒淇加名導馮德倫嘅屋企，布置好平凡，但牆上掛咗幅當地著名非裔美國女性藝術家Mickalene Thomas嘅作品《tete de Femme #4》，都叫做加添咗藝術氣息。唔少網民留言：「誰家金像獎獎盃隨便這麼放？」、「你並沒有整理啊！」、「請收納師幫你整理！」、「美女的家通常都很多東西很亂的。」