隱娘︱黃智雯唐朝造型曝光　網友大讚氣質出眾

藝人黃智雯現正於內地為金牌監製戚其義新劇《隱娘》拍攝，聯同出爐視帝譚俊彥（Shaun）、楊謹華合作，萬眾期待。平時藝人去到內地拍劇，都會有唔少粉絲冒住被發現嘅風險，山長水遠去到拍攝地點偷拍偶像，估唔到少有喺內地現身嘅黃智雯，今次都被粉絲發現，仲將佢今次新劇唐朝服飾造型曝光！見佢妝容淡雅，造型樸素，望落更加係溫婉大氣，即時迷倒一眾網友，睇嚟新劇出街之後，佢一定會攻陷內地市場。

對於首次正式演古裝，還未等及劇集開播，已被網友大讚造型，絕對是意外收鑊，智雯接受東網訪問時笑說:「第一次試唐朝造型，我都好滿意，因為個妝容要好淡，為咗要皮膚保持良好狀態，我每日都要敷面膜(習唔習慣內地拍劇生活?)都ok，不過仲未碰到其他主演，其實今次係好難得機會，可以同中港台出色嘅演員合作，相信係一個好寶貴經驗(粉絲見你喺演員名單排位後好唔抵!)我覺得戲份唔係重點，係點可以做好個角色，相信係我嘅粉絲會戥我高興。」更指日前「出關」後即去嘆咖啡，由於內地疫情出現小爆發，所以只敢於酒店範圍附近閒逛:「我有第一時間出去吸收新鮮空氣，不過做足防措施，只係飲番杯好正嘅咖啡同食餐好嘅啫!」