老公悶到發癲！甘願為苑瓊丹北上愛的隔離

近年專注內地發展的苑瓊丹，日前有份投資的超級市場開幕，可惜身處內地的她未能回港參加開張儀式，惟有透過網絡直播亮相活動，與其他股東齊齊切燒豬：「投資幾錢做生意就唔講啦，最緊要有冇『錢途』，我睇好前景就夾份囉！疫情期間超市生意都好好，因為大家都留屋企食飯，睇準需求就有得賺，嚟緊我哋班股東都會開拓自動售賣機市場，希望都有作為。」

自從農曆新年後北上發展，與老公數月未有見面，她表示不會叫老公幫手管理生意，笑指財政獨立「各有各搵」：「有人問我係咪夫妻分隔兩地，老公見唔到我太閒，所以開檔嘢畀佢忙吓！傻嘅，我理得佢忙定得閒，依家我都忙到踢晒腳，仲搞啲咁嘅嘢？佢真係悶到發癲又掛住我嘅，咪嚟陪吓我囉，佢肯為我隔離，呢個就係愛嘅表現啦！」