網上做直播　父親用手機為阿正拍片獲網民激讚技術好

疫情反覆持續，好多人都習慣咗將工作帶返屋企，藝人黃正宜（阿正）喺社交網上載一段短片，片段入面阿正正喺度同幾位同事包括兩位《膠戰》嘅戰友Hillary（劉沛蘅）同肥腸（徐浩昌）做緊直播，而阿正爸爸就用自己部手提電話不停拍片影住愛女，而且仲好認真，識得運用鏡頭運動手法「Tilt Up」，搞到阿正都忍唔住笑，要同同事耍冧解釋一番。

阿正就喺短片下面留言：「話說前排疫情期間，要喺屋企用電腦直播上電視節目。當晚全場最唔Care嗰位去到節目直播出街時，竟然全程拎電話拍低我上電視嘅畫面，仲要有 Cam movement！！！由電視機Tilt up再影返我，我笑到癲咗！人生最重要嘅，就係呢啲有錢都買唔到嘅體驗。」片段吸引過萬網友讚好及留言：「正爸好cute亦好有攝影sense，個tilt 有feel喎」、「Uncle真係SO正」、「原來正姐嘅搞笑方面係遺傳」，而好友游學修亦有留言大讚正爸：「個tilt好優秀」。