Joey霆鋒坐鎮全球直播騷　狂吸高達370萬人收看

藝人成龍前晚（25日）於內地直播平台舉行全球直播騷，邀得天后容祖兒（Joey）及男神謝霆鋒加入直播擔任嘉賓，高峰時期有高達逾370萬觀眾收看，大受歡迎！其中Joey與成龍暢談相識經過，原來成龍係Joey嘅伯樂，當年聽過Joey唱歌即說服老闆簽佢做歌手：「我聽她在唱。唱完了我叫她背着臉給我唱，她就背着臉唱了一段。完了我就告訴她老闆，把她簽了，她將來一定會好，把她簽了。」Joey則憶述當年見到對方好緊張，仲笑言第一印象覺得佢身形好似山一樣咁魁梧，之後2人又合唱《明明白白我的心》。

及後霆鋒現身直播，成龍大讚佢肯博肯捱，拍戲唔用替身堅持親身上陣，仲話佢有個人想法，睇好未來做導演：「你將會做導演、會做武術指導、會做編劇，這是你必要走的路。」之後有網友加入直播表現功夫，2人抱拳打招呼，惟霆鋒「右掌左拳」嘅動作，被指帶有攻擊性意味，應相反「左掌右拳」較適合，但亦有網友解釋可能只係鏡頭導致左右調轉先產生誤會。