食豬糧惹熱議　容祖兒拋金句回應：試過先知好唔好味

天后容祖兒早前於內地節目《牧野家族》，親自下廚炮製美食畀豬仔「豬福」，仲不惜親身試味食豬糧，即引起網民熱議。事後佢開腔回應，其實食豬糧係用心良苦，佢表示因為要試過味先知好唔好味，希望豬仔能夠食得開心，故未有顧慮太多，而事實上當時Joey烹調南瓜湯畀豬仔，並非進食一般嘅豬糧，為咗豬仔出心出力，認真唔話得。而講到今次節目，佢就指係作為城市人難得嘅體驗，從中得到好多啟發，學習咗好多生活小知識，亦趁機喺大自然中淨化心靈，注滿正能量。