張栢芝透視裝賣貨到凌晨　買家狂轟貨不對辦

女星張栢芝依家「轉行」做直播帶貨大受歡迎，曾創下破億營業額佳績，食過翻尋味嘅佢一連兩晚都開Live賣貨，其中一晚佢仲以Low cut透視裝上陣，仲晒出白滑美腿，加上佢有求必應，又「賣笑」又講感情事，仲專業到今日（26日）凌晨12點都仲Sell緊貨，難怪佢營業額夠晒靚仔，敬業行為令網友狂讚！

雖然佢好落力幫手散貨，但有商家就打住佢個名嘅旗號，借佢直播間賣出多套牛奶絨四件套裝，點知有買家爆料力斥貨不對辦，同直播間描述唔符合，被套薄兼多線頭等，認為有被欺騙嘅感覺，而件貨嘅網上Link就寫到明係「栢芝專享」。位買家事後向栢芝直播間官方售後客服投訴，對方指售出商品唔係假貨，可能係商家出產時個別產品出現瑕疵，團隊會跟進及處理，並願意接受退貨、退款，不過位買家仍要求一個交代。