胡鴻鈞周柏豪離巢　吳業坤坐正「星夢一哥」

歌手周柏豪去年離港北上發展人氣急升，不過早前佢宣傳新歌時只標籤經理人公司種星堂，未有提及唱片公司「星夢」等，加上TVB Music Group各大官方平台歌手名單上未見「周柏豪」個名，即被指完約離巢。估唔到「星夢一哥」胡鴻鈞亦被發現已經「消失」，星夢僅餘吳業坤、鄭俊弘、謝東閔及伍富橋四位男歌手，吳業坤榮升「星夢一哥」。

胡鴻鈞於2021年初離開星夢後，改與邵氏簽約，但離巢兩個月後重投星夢懷抱。佢喺11月推出《我們在結束時開始》之後，一直再未有新歌推出，而其社交平台喺聖誕節後亦未再更新，本月6日深圳開騷後亦未見出席公開活動，一直到本月28日將到澳門出席新春活動。

吳業坤接受東網訪問，表示不敢當「一哥」：「啱啱喺內地返嚟香港冇耐，即刻不停開會、錄音、準備拍MV，所以都冇留意其他人嘅動向，我淨係知道公司將會投放好多資源，都有傾過，但你話一唔一哥呢，都冇去睇重呢件事，但你話年紀上最大嘅男生就係我，不過我最遲加入，其實都係小師弟，今年都將重心擺喺音樂上，2月會出歌，3月之後都會不斷派歌，希望大家感受到我音樂上嘅熱誠。」