陳瀅逆向圍桃花行冇有怕　靠自己擺脫單身

藝人陳瀅與孔德賢（Danny）今日（18日）出席店舖開幕，陳瀅更獲贈超市禮券，她表示正好用來辦年貨帶回溫哥華：「年初一會飛返加拿大，計過嗰日啲機票最平，落機嗰邊時間仲係年初一，會留兩星期，返嚟就開始拍《痞子殿下2》。」她表示自小就跟隨母親的一些過年習俗：「年廿八洗邋遢、年初一唔洗頭。（會買桃花催感情運？）上星期試過圍住桃花行個圈，點知行錯逆時針，哈哈！返加拿大行多次行番啱。」她笑言靠自己比靠桃花實際得多。

至於Danny就表示每年也會陪媽媽辦年貨及煮齋菜：「媽咪好傳統，有好多儀式要搞，年初一二三都要拜年，最開心𢭃利是。」他指原先安排新年後開拍的新劇現已延遲，想趁多出的休息時間增值自己：「想學打高爾夫球同煮嘢食，人大個要轉路線做住家暖男。（學定預備結婚？）住家暖男唔一定係結婚嘅，煮畀自己食又健康又慳錢。」現時單身的他，直言想以結婚為目標找伴侶：「唔想拍散拖，又拍拖又分手好煩，最慘如果開緊工會影響心情，想要穩定關係，所以要比較謹慎先開始。」