范丞丞主動讓座畀劉亦菲　獲逾億網友讚有風度

內地女星范冰冰早前帶挈細佬范丞丞入行，范丞丞甫出道就已經人氣爆燈，演藝資源更係愈撈愈有，最近人氣節目《奔跑吧》第11季公布固定班底，名單中包括李晨同范丞丞，眾所周知李晨係范冰冰前未婚夫，節目未播，范丞丞同李晨先炒熱度。估唔到年紀輕輕嘅范丞丞更識大體，尋日（23日）佢出席品牌活動，遇上「神仙姐姐」劉亦菲，佢主動讓座女士嘅紳士片段亦同時流出。片中佢一見到劉亦菲老遠行緊過嚟，就已經立即企起身，示意讓座畀劉亦菲，即被大讚禮貌100分！雖然片中劉亦菲似乎未有同佢打招呼，不過范丞丞一啲都冇尷尬，仲二話不說坐女神身旁，仲偷睇對方同另一同場女神佟麗婭selfie，即被網友笑指佢其實係嚟追星，「#范丞丞給劉亦菲讓座」話題半日時間更已有1.1億閱讀量，確係有人氣。