曾奪香港金像獎最佳男配男的著名動作演員孟海（原名：孟景海，暱稱小海）今日（10日）突傳病逝，終年65歲，藝人杜大偉和趙永洪在社交平台發文悼念。據知孟海於昨日（9日）傍晚過身，去年他一直覺得唔舒服，驗出癌症第4期，在人生最後2個月捱得十分辛苦，其太太和17歲女兒都全力照顧孟海和陪伴在側。而孟海女兒仍讀書，所以孟海不少兄弟，都一直為他的病籌錢，並會協助辦理身後事。

其姪女孟希璘接受東網訪問時證實孟海離世消息，她透過短訊回覆：「有心！二伯係上年發現食道癌，都努力治愈咗一段時間，可惜都係冇好轉，今晚（昨晚）過身嘅時候都好安詳，呢段時間都辛苦佢太太每一日都長時間陪伴同照顧，太太同女兒同我爸爸係呢大半年都慢慢接受咗二伯可能離開嘅狀況，到離開一刻都係會好難過，但大家都希望佢可以離苦得樂，唔使再受病痛之苦。主要嘅幫忙係搵醫生，因為發現嘅時候狀況都已經比較差，搵咗好多醫生幫手諗治愈方案，多位藝人前輩，二伯嘅師兄弟，仲有武師公會一直以來嘅幫忙同埋探望，二伯生來人緣都好好，一直都好多朋友探望，感恩大家出心出力。」孟希璘是孟龍的女兒，孟海是她的二伯父。

其胞弟孟龍表示，哥哥孟海去年10月左右因吞嚥問題而發現患上食道癌，但因發現得太遲未能進行手術，有接受電療及化療，但未有成效，期間一直住院，後期癌細胞已擴散至胃及淋巴等其他器官，並要打孖啡止痛，他說：「佢走得好安詳，冇乜牽掛同遺願，佢之前一直都好清醒，係最後一星期個人有少少模糊。對佢嚟講都係一種解脫，都捱咗一年。」問到孟海太太及女兒情況，他透露家人情緒OK，現時休息中，因為由發病至今一年，她們已接受，至於經濟問題？他稱：「暫時都OK，佢個女今年17歲，可以照顧到自己，佢太太之前冇做嘢，咁可能出番嚟工作囉！」

錢嘉樂接受東網訪問，對於孟海的後事安排，他說：「我昨晚都有聯絡過佢太太，一有消息會公布佢後事安排。其實我哋一直都有了解佢患癌消息同探佢，工會會幫手搞後事同佢個女以後嘅生活。」錢小豪對於孟海離世大表惋惜，慨嘆人生無常：「佢分人好好，交遊廣闊，我哋係未入行已經喺洪金寶嘅公司認識，佢首執導演筒都搵我做男主角。」他又指早兩個月前在同行口中得悉對方身患惡疾：「好似話當時約佢出嚟食飯，佢已經唔係好食到嘢，又唔係好想睇醫生，噚晚我就喺盧惠光口中知道佢離開咗。（會幫手搞喪事？）有需要都會嘅，問吓盧偉光點聯絡佢屋企人啦。」

而好友盧惠光指與孟海相識四十多年，亦是自己的恩人，他謂：「佢拍嘅第一部戲想搵我做男主角，可能因為種種原因，拍唔成，但佢係我圈中一位非常尊重嘅人，佢為人好低調，唔喜歡應酬，喺呢個圈會好蝕底，佢有嘢就做，好勤力。」孟海向來不喜歡睇醫生，23年前曾患肝炎，當時幸得盧惠光一再敦促對方去睇醫生，才發現患病，而今次，盧惠光亦有着他去醫生，他謂：「我一見有太陽就會約佢游水，同佢食嘢，佢話吞唔到嘢，我叫佢睇醫生，一睇就中咗（患癌）。」

孟海一生為香港電影貢獻良多，尤其是功夫電影。早於1968年，他以童星演人生第一部電影《風塵客》而入行，1985年憑《皇家師姐》榮獲第5屆香港電影金像獎最佳男配角獎，並獲七次提名香港電影金像獎最佳動作指導獎。

孟海是戲班出身，七歲時拜刀馬旦粉菊花師傅為師學習京劇，與陳寶珠、蕭芳芳、林正英、惠天賜、楊盼盼等為師兄弟，是粉菊花最喜歡的兩個徒弟之一。離校後獲安排為多個電影擔任替身和武師，慢慢成為動作指導，直至18歲，李小龍欽點孟海在電影《麒麟掌》演出，及後再在《龍爭虎鬥》主演，正式為他打響名堂，他表示當年李小龍要求他在片場要一直跟著，戲以外要幫手跟頭跟尾，有時又會過兩招切磋一下。孟海後來憑《皇家師姐》榮獲香港第五屆電影金像獎「最佳男配角」獎。

孟海在不同殭屍電影系列中與師兄林正英成為最佳拍檔，經常都孖公仔出場，孟海飾演粗心大意的助手，經常要被林正英提點，他經常闖禍加上鬼馬的表情，令不少觀眾留下深刻印象。功夫電影熱潮到80年代尾，開始慢慢減退，孟海由幕前工作慢慢退到幕後，擔任動作指導或者導演，特別是北上發展有不少機遇，繼續為武打電影出一分力。直至女兒出世之後，他決定多留香港照顧妻女，把重心放在香港。