雲浩影豁出去拍MV　飛撲落床撻十幾次

「治療系女聲」雲浩影（Cloud）初嘗作曲人滋味，其創作班底幾乎是她之前作品《氣流》一樣，令她特別開心：「寫咗呢首咁澎湃、咁感動嘅歌。歌詞係講，有啲人陪我哋走過青春，久唔久會諗起佢，想知佢過得好唔好？啲人成都話要『放低』，但我自己覺得『放唔低』都唔緊要嘅，所以就有呢首歌《放下放不下》。」

Cloud在MV中有一場要飛撲到床上，然後三位工作人員從後向她身上拋下幾張毛氈，要夾好時機拍出效果，她來回飛撲了十幾次，導演才收貨。事後Cloud回想場景都忍不住笑：「真係撻咗好多次呀！因為要夾埋工作人員嘅動作，而我想畫面唯美啲，保持個樣靚，希望跌落床一刻感覺溫柔啲，但其實係撻落去！」

她在MV中穿梭睡床、課室、醫院和夢境等場景，她說：「MV故事講我夢入面返去回憶，回憶中有一個男生陪我走過青春，縱容或者係容忍咗我嘅任性、教識我成長、學習去愛人。可惜長大之後，我愛嘅人不再係佢。MV裏有一場醫院景，寓意我係一個愛情病人，對愛情好執着，放不下嘅人。呢首歌就係講：一係就由得佢，一係就完全放下。（你會點揀？）希望自己某程度由佢放唔低，唔使咁執著一定要『放下』，因為都係美好回憶，陪伴大家走過青春。」