練樂儀「復出」做電單車女郎　健康性感一樣受落

藝人練樂儀及網紅Lingling上周日（5日）齊齊現身香港電單車節，以電單車女郎身份為品牌宣傳，吸引幾十名龍友及車迷喪影，場面墟冚。早前因疫情而暫停幕前工作嘅練樂儀，重返專業護士之列，不過依家隨住疫情減退，佢都積極「復出」：「好興奮呀！其實今次出嚟，都見到好多粉絲到現場支持，好開心佢哋都冇忘記我，好開心。」提到今次一身黑綠打扮較以往電單車女郎衣着保守，為配合大會以電單車為主嘅方向，改以Sporty打扮示人，不過入場人士仍表現熱情，紛紛舉機拍攝二人，令兩女都估唔到健康性感大家一樣受落，喜出望外。

Lingling亦係疫情後首次再出席大型公開活動，直指係一個好嘅經驗：「見到好多好熱情嘅觀眾，我都覺得好鼓舞。好感恩疫情減退，我都可以見吓大家。」