翟威廉單身唔急拍拖　嘆市道差生意難做

藝人翟威廉（William）今日（26日）出席活動，明顯清減了的他，笑言全因年紀大，故多做運動保持健康所致：「以前就可以靠打籃球，依家年紀大啲關節頂唔順，主要做健身。」現年39歲的他表示現時單身，坦言感情方面隨緣，現時先專注工作：「之前拍咗套單元劇《非份之罪》，講一日內發生嘅事，因為好重視細節，所以都拍咗1個月。」

他透露除了拍劇，亦有繼續夾Band，談到他的清酒生意，他即大嘆經濟市道差，做生意的都應該感辛苦：「市道好差，零售同批發都難做，加上唔同政策例如垃圾徵費都影響做生意。」他透露原先經營的地舖現已退租，改往樓上店經營，主力做網上訂單：「盡量減少成本，冇租地舖慳幾萬蚊冇咁大壓力。（睇淡市道？）呢一兩年個市道都係睇淡，守住先。」他坦言比起其他生意例如飲食業，自己已不算慘，起碼還有演藝工作可保住收入。