被媽咪踢爆成日講怪嘢　李元元靜雞雞放屁尷尬笑

藝人李璨琛同太太梁志瑩（Sophia）育有兩名女兒，其大女李元元（Lucy）可愛活潑，係好多人嘅開心果。梁志瑩周不時都會喺社交網分享囡囡嘅日常生活，日前佢上傳咗一段Lucy嘅短片，並寫道：「老母依家就出發去佢學校，睇吓有冇得玩貪玩遊戲先。」之後表示Lucy成日講啲怪嘢以為自己係啱，除咗貪玩遊戲，仲有精明九肚魚同埋超人(能)膠，又笑言雖然自己知道佢講錯，但因為太好笑所以冇諗過糾正返。

最搞笑嘅係，片中Lucy一臉正經地同媽咪講學校嘅「貪玩遊戲」，到結尾時突然對鏡頭尷尬一笑，同時聽到有放屁聲，於是有網友留言問：「最後係你放屁定LULU放屁」。梁志瑩即可為自己澄清：「係Lulu，所以佢咪尷尬笑囉！」並笑指「老母係唔放屁嘅」。