港姐小花出國鬥索　晒白滑長腿誘Bra滲仙氣

港姐季軍王敏慈仍於北京中央戲劇學院讀書，不過同時佢都兼顧幕前工作，早前就為麥長青、江美儀主持嘅無綫旅遊飲食節目《大灣區美味好玩攻略》擔任嘉賓，靚靚見人。一向被指有「膠味」嘅佢，過年前更飛去泰國旅行，孖同屆參選、賽後爆粗同網民開火嘅「黑臉神」佳麗陳怡名（Zora）。二人身處高處觀賞泰國夜景，雖然王敏慈搣甩網紅妝，改以氣質淡妝示人，更顯皮膚白皙清秀，仙氣十足。惟網友發現佢一身淺粉色satin裙仔，竟暗暗透Bra，不經意嘅性感被網友狂讚有Feel。

而25歲的聲夢小花潘靜文（Sherman）原來都去咗玩，佢就晒出身處新加坡地標酒店Marina Bay Sands頂層，攞住香檳飽覽新加坡景色，仲由斯文look換上吊帶黑色波點長裙，加上條裙低胸設計配邪惡視角，連佢都罕有「曝光」事業線，散發濃濃女人味。佢去到其他景點亦大晒白滑長腿，低炒角度更似9頭身，索爆。