歐倩怡自爆玩交友App　網民插爆失言：出少句聲啦！

藝人歐倩怡（Cindy）與郭晉安早前宣布離婚令全城震驚，近日Cindy離婚後首度亮相節目，開腔大談感情狀態，坦言現時抱開放態度：「冇所謂，有啲七老八十先遇到真愛喺埋一齊啦，我諗依家呢個世代，緣份擋唔住，要走又挽留唔到，人生就係離離合合，生老病死」，更自爆正玩交友app：「女人真係唔好讀太多書，真係有啲男士係會驚你，講個秘密畀大家知，最近開始玩交友App，profile寫自己咩咩咩，勁得濟係嚇親人，所以盡量簡單啲！不過原來鍾意運動嘅女人，係原來多啲人like。」

但她表示只是實驗性質，並非一心想拍拖：「16歲開始入娛樂圈，我個世界都係娛樂圈入面嘅人，近呢一年喺中醫診所打工，開始接觸呢個社會，但其實好多人際關係、社交手腕等，以前都係靠晒經理人，呢方面我係好渣。所以，其實我係想睇吓呢個世界，唔同行業嘅人做緊乜。」她又言有相約網友見面，笑稱app中靚仔多數「伏」。

她又提到原來4年前曾大病一場險死，指在2019年12月患重感冒，一直發燒睇了3次醫生也未退燒，全身更有觸電感覺兼呼吸困難，隨後更出現失禁情況，甚至驚現人生走馬燈：「我攞住個痰罐，最後我只飲咗少少（片糖水），我想話你知，嗰刻我已去到失禁，我已經控制唔到，搞到張床周圍都係。去到失禁一刻，我已經知自己唔得，然後好似做戲咁，開始出現人生回帶，我覺得唔得㗎，我啲仔女太細，會諗仲有啲咩未做，跟住我暈咗，成個頭塞咗入痰罐，暈咗。」在緊急關頭，向枕邊人求救，但歐倩怡說︰「跟住佢話︰『咪玩啦！瞓覺。』」事情再發展落去，連蝦頭都O嘴！及後她入院留醫，得知患肺炎、肝炎、腸炎、尿道炎等，食藥長達半年才康復。

不過今次歐倩怡上節目，卻引來大批網民圍插，直指她離婚後將私事公開有所不當：「睇完就知點解離婚」、「出少句聲啦」、「啲仔女仲要返學見人」、「私隱何必要公開」。