章子怡疑不滿新片戲份被刪　意有所指惹揣測

名導陳可辛執導電影《醬園弄》未上映先期待，早前眾人飛法國康城舉行首映禮，頓成全場焦點，不過都唔夠演員間是非咁吸睛，繼早前花旦趙麗穎同楊冪明爭暗鬥女二之名，又有出場先後排序等，章子怡孭飛但因零話題慘變隱形人，即使佢空降康城首映時風騷企中間，楊冪要靠邊站，不過都難遮傳聞。近日章子怡接受訪談時，佢就疑似發表疑似不滿《醬園弄》戲份嘅言論，令不和傳聞再現觀眾眼前。

訪談間，章子怡就提到自己對演技事業嘅期盼：「我熱愛這一行，所以我想要突圍。」佢表達自己未來想演「更有力量的、更極端的、更有突破的角色」，主持即問到：「詹周氏（《醬園弄》角色）還不夠嗎？」佢即場表示：「我演的時候，我覺得她是夠的…」網友即聯想到佢係暗示傳聞中女主角戲份被刪一事，女主角慘變「群演」。其實早前有指為平息趙麗穎同楊冪之間嘅不和，有傳新片將增加二人角色出鏡率，以平衡二人戲份，不過就間接犧牲女主角章子怡出場時間。不過亦有網友指係大家諗多咗，只係章子怡演完詹周氏後，佢期待一個比詹周氏更有力嘅角色。