港姐︱泳裝晒冷全封胸　陳甜甜「3D波」依然有睇頭

《2024香港小姐競選決賽》將於明晚（15日）舉行，一眾佳麗今午以泳裝姿態會見傳媒，唯謝淑怡及李曼思因病缺席。佳麗清一色着上紅色兩件式泳衣，上身設計完全將上圍包住，封胸冇線頭，但仍無阻有料之人騷身材，當中被指有「3D波」的陳甜甜及禾稈冚珍珠的鍾翠詩（Tracy）最為出眾，其他佳麗身材明顯被泳衣剪裁「拉扁」，陳紫佟（Jessie）更驚現平板身材。

有份現身的13位佳麗身材優點及缺點全部暴露人前，其中「高妹」楊梓瑤愈戰愈勇，葫蘆身形盡現，甫現身即驚艷全場，而吳芷靖一身雪白肌膚，同樣吸睛，反觀陳紫佟被發現「零曲線」，秦冀雯三點式的下半截穿搭着到似「甩褲」，明顯腰長腳短！

活動上盧凱怡被抽出試戴后冠，獲師姐莊子璇「加冕」，受訪時她顯得自信滿滿。談到被抽中，她坦言：「嗰日綵排嘅時候抽籤，15個人抽中我，真係好驚訝。（依家係咪好有自信？）都係嘅，頭先真係好似頒緊獎畀我咁，今日畀我綵排一次，希望聽日我都有機會戴到后冠啦。（有冇聽過試戴后冠係魔咒？）前幾年聽過，但自從上年莊子璇打破咗之後，我就覺得一切嘅魔咒事在人為，只要自己有實力及水準，任何嘅魔咒都可以打破，絕對唔係成功或失敗嘅原因。」

她直言其他好幾位佳麗表現出色，算是勁敵：「好似倪樂琳同楊梓瑤。我覺得每位佳麗嘅優點都好唔同，都係要睇評判嘅心水同網民嘅支持囉。」至於憑上圍35 1/2於一眾佳麗中「稱霸」，盧凱怡說：「可能開始嘅時候我係肥少少，上圍嘅量度可能加埋背脊位，大家嘅身形其實都好均稱。（覺唔覺得今日件泳衣令你禾稈冚珍珠？）都OK呀，我望落其它佳麗啲身材都唔錯，泳衣唔會太性感，亦展現出我哋嘅體態。（聽晚泳衣性感啲？）差唔多，但係應該更加靚。」

當問到謝淑怡及李曼思生病情況，她表示：「我唔知佢哋具體嘅情況，不過尋日綵排都好長時間。佢哋陣間會出現總綵排，會了解吓佢哋個情況，大家都要保重身體，希望佢哋聽日順順利利。」她又坦言會保持心態去迎接明天決賽：「總之唔好怕輸，亦都唔好諗住贏，最主要係做好自己，同埋表現出最自信嘅一面。」

大熱倪樂琳、陳甜甜和楊梓瑤三人來到決賽前一日，楊梓瑤表示自己愈來愈有自信，而陳甜甜自覺狀態漸佳，又指對泳裝環節一點都不緊張：「因為我身材都OK，依家都好有信心。」而倪樂琳就言明天就是決賽日，必須愈戰愈勇，敢言有14位好姊妹相伴，所以不害怕。

提到試戴后冠的盧凱怡視倪樂琳和楊梓瑤為勁敵，楊梓瑤聞言大感榮幸，又言每個人都有自己的魅力和特質，而同時作為全場最高的楊梓瑤亦指身高幫自己在泳裝環節更加出眾：「15個女仔你一眼望落去，應該係最高嗰個最突出，所以啲人應該一眼就望到我，幫我加強自信心。」而甜甜則指自己最大的優勢在於自信：「因為我知道自己廣東話麻麻哋，所以我更加要有自信比評判睇到，而且我自己嘅樣同埋性格都比較甜美，我諗呢啲都會幫我加分。」並激動表示自己廣東話雖然差，但觀眾都不討厭自己，好開心，覺得自己可以走搞笑路線。

至於「由頭帶到尾」的倪樂琳表示沒有壓力，反而想快點結束明天的決賽，就可以去食快餐：「我鍾意食熱氣嘢，但我又驚爆瘡，噚日因為綵排太攰，我已經偷偷地去買咗零食。」她們透露昨日綵排時間長，陳甜甜還在沙發上睡覺，笑言完全不知道自己睡着了：「我醒嘅時候已經露點裝（六點鐘）。」另外問到兩位因病缺席的候選佳麗謝淑怡和李曼思的病情，倪樂琳就坦言謝淑怡昨日已經有點身體不適，而李曼思就在吃完晚飯後，凌晨時分傳短訊問她「有沒有不舒服？」李曼思指自己胃痛。