鮮娛糧︱關嘉敏生日有花收　疑有新戀情

藝人關嘉敏近日剪短頭髮，在社交網晒生日收花，她抱着大束黃色玫瑰，笑到冧滋滋，疑似有新戀情？她發文：「最近個個都問做乜剪短，邊個逼你剪短咁多？Um 冇人逼我，係我逼髮型師叔叔剪，但剪完之後一發不可收拾，想keep 住短，我已經入咗坑了。」問是否有追求者？她笑言：「我都想，係成枱朋友一齊夾的，知我冇愛情滋潤，畀返啲愛我。」

關嘉敏透露自從30歲後，思想有變，感情不想抱玩心態，希望拍拖可以有長遠關係，向着結婚目標走。她說：「係有人追，但唔想立亂揀，自己唔識玩感情，想認真啲揀，可以包容到我工作不定時嘅，（有潛質人選出現？）未有適合，所以都係工作為先，遲啲又出歌又拍嘢，都冇時間，隨緣啦！」而剪短頭髮純粹想轉換新形象，向來長頭髮的她，生日很想改變，「我唔再係以前𡃁妹，希望改變新形象。」