王子涵叫番真名「王海榛」：用番呢個名有啲唔慣

電影導演王晶愛女王子涵早前宣布離開效力8年的無綫，之後集中火力作個人發展。近日經常於社交平台拍片分享的她，更宣布用回真名「王海榛」，並叫網民多多指教，她表示﹕「用咗『王子涵』呢個名咁多年，依家要用番『王海榛』呢個名都有啲唔慣。雖然我知道好多人只知道我嘅身份，而唔知道我叫咩名，所以我希望今次改名，你哋都可以記住我﹗」

談到「改名」，海榛昨受訪坦言﹕「『海榛』係我一出世，爸爸就幫我改嘅，而身份證上我一直都沿用緊，係後嚟入行爸爸又幫我改咗叫『子涵』啫，不過近來有師傅話用番『海榛』整體都會好，咁咪聽佢講囉。（有乜新工作？）暫時都係拍片為主，總之乜都試吓囉，亦都有同爸爸喺網上主持節目。（唔會再簽番公司？）如果有公司搵我合作，我好落意傾吓㗎。」而成為KOL後，海榛所拍的短片相當多元化，餐食、扮靚及旅遊一應俱全，她更不介意公開敷面膜介紹護膚產品，表現貼地。