MIRROR互揭秘密！姜濤被爆鍾意刷牙兼成日換底褲

男圑MIRROR 12子今日（1日）接受鄭裕玲（嘟嘟）主持的電台錄音訪問，他們透露12月將拍攝新圑綜節目，而拍攝地點留在香港：「會試啲未試過嘅，但一定係老少咸宜，未知拍乜，不過有啲會返錄影廠，同埋出去外面做啲任務，12月拍12月出街，共5集，每集半小時。」

節目主持嘟嘟要12子互爆秘密，Stanley指姜濤鍾意刷牙及經常換底褲，又不准其他人用他的廁所，姜濤即反爆Stanley受痛風困擾。Anson Lo就爆Jeremy會逼貓貓同睡，即被對方反擊有鋪「索嘢癮」：「佢成日聞屋企隻狗啲腳仔」。至於Jer就指Edan鍾意睇超級跑車，亦沒有考棍波車牌，Edan反擊指Jer打機成狂。