吳彥祖覺得自己唔靚仔　從不P圖接受自然地老去

男神吳彥祖係公認嘅美男子，出道以嚟都係以靚樣見稱，不過自結婚生女後，佢決意闖蕩荷里活市場，更多次為新片角色而「犧牲」靚仔外形，主力以演技行先，令人大讚佢敬業樂業。最近佢接受內地媒體訪問時，就坦承細個原來對自己顏值唔自信，冇覺得自己係一位靚仔，仲好接受自己自然地老去添。

佢提到因為喺美國長大，佢認為「靚仔」係金頭髮、藍眼睛嘅，所以一直都唔覺得自己高顏值，所以佢細個曾有唔自信時候。直到佢嚟到香港發展後，大家都力讚佢係高顏值型男，不過佢都係冇去諗呢啲嘢，仲表明自己唔係愛打扮嘅人，都係舒服最重要。

而佢亦表明自己從不P圖，因為美圖後個樣唔係真正嘅自己，佢都唔想扮年輕，反而樂於接受自己已經50歲，唔會介意年齡問題。