蔡卓妍聲帶未愈　「湯碗胸」轉移視線

藝人蔡卓妍（阿Sa）年初完成14場Twins紅館演唱會後，緊接展開內地巡唱，忙個不停，在廣州站尾場更發燒，雖然她表示身體冇大礙，但日前單拖到澳門商演時似聲帶未愈。當日阿Sa以閃爆造型登場，頭戴寶石頭箍，配襯低胸吊帶裙，連唱幾首經典歌《天生一對》及《死性不改》等，雖唱得有點吃力，但仍堅持完成，沒有走音。

現場歌迷亦相當識做，為阿Sa大聲伴唱，亦為她罕有的性感着迷，皆因天生瘦底屬A Cup身材的她，當晚竟谷出「湯碗胸」，期間她與歌迷互動：「你哋食飯未？我未食飯，因為要着呢條裙，好唔好睇？」又走近歌迷握手，氹到全場笑聲不絕。騷後有網民讚她超美，又為她疑似聲音受損大表心痛，幸而兩日後，其病況似有好轉，孖好友容祖兒出席飯局，齊齊舉杯飲香檳。