小S倒追老公許雅鈞　為冧仔投其所好送禮

台灣藝人小S（徐熙娣）同丈夫許雅鈞育有3個女兒，大女兒許曦文（Elly）、二女兒許韶恩（Lily）、小女兒「許老三」許曦恩，而睇番向來敢愛敢恨嘅小S，過往每段戀都係愛得轟烈，當年同黃子佼交往時，小S就坦言係自己追黃子佼，未料最後因對方移情別戀提分手，令當時身處外國嘅小S深受打擊，甚至後來喺節目《娛樂百分百》直播上痛哭祝福對方，瞬間掀起熱議。

而同黃子佼分手後，小S亦曾公開表示有過幾段戀情，直到好友介紹，小S先認識許雅鈞，並主動展開追求。深知許雅鈞喜好嘅小S，更搵嚟范曉萱幫忙錄音翻唱許雅鈞偶像鄧麗君嘅歌曲，作為生日禮物送畀對方；然而，亦有另一說法係2004年3月小S同許雅鈞喺朋友聚會上認識，當時男方對女方一見鍾情，後來數度喺朋友聚會上見面，直至許雅鈞帶小S返洛杉磯拜見父母，2人先正式確定關係。