娛圈單打︱小龍女笑意盈盈 靖哥哥孔雀開屏

2024年10月27日 00:01
東網電視
更多新聞短片
歌仔都有得唱:「當風箏遇上風……天空中愛得英勇」,咁當靖哥哥遇上小龍女又會點呢?嗱,飽受偷食人夫醜聞困擾的「小龍女」龍婷,沉寂一時又活躍起來,早前隨明星足球隊到天津表演獻唱助興。當中最吸睛莫過於唱K慶功嗰陣,小龍女與黃日華貼到實一實合唱金曲,畀「小龍女」電兩電,「靖哥哥」當堂冧晒!
話說當日小龍女在球場上獻唱已經紮紮跳,跳到輕露白滑纖腰,非常搶眼;到了跟靖哥哥喺K房合唱《射鵰英雄傳》主題曲《鐵血丹心》,更係眼波流轉,電力四射。二人由最初略見拘謹,雙方隔咗個身位,到後來打破隔閡,愈唱愈貼身,靖哥哥顯得非常受落,笑到四萬咁口!
所以話啫,小龍女幾時都對成熟男士有一手!唔止令65歲已婚演唱會製作人丘亞葵神魂顛倒,為佢創出「Hello Kiss」震驚全城,就連經歷喪妻之痛、單身已有4年的黃日華,都一樣忘形孔雀開屏!再睇吓佢日前偕「死敵」支嚳儀上郵輪出騷,在場粉絲九成九係成熟男士,小龍女又稱「阿伯殺手」,一啲都冇誇張。
呢嗱,龍婷表明唔講私事,外界想從佢口中得悉係咪已有老公仔女,真係咪使旨意。靖哥哥黃日華則坦蕩蕩得多,太太病逝後,見佢出席活動都係一大棚人,似乎真係冇女埋身喎。
傳得最盛係同關寶慧一段煲水緋聞,內地仲一度瘋傳黃昏戀修成正果添。但隨着關寶慧否認,黃日華懶得回應,呢段黃昏戀亦不了了之。難得靖哥哥遇上小龍女咁冧豬,可見都Dry咗好耐,大家不妨祝福華哥快啲搵番個伴啦。