Jocelyn重返香港模界　兼任心靈導師

有「翻版關之琳」之稱的混血名模Jocelyn於2017年為照顧中風的母親，偕老公Anthony毅然放棄一切離港，返回家鄉夏威夷，並於2019年誕下兒子Bodhi。久未在港露面的Jocelyn近日獨自返港舉行關於心靈健康，及能量治療的工作坊與講座，她透露今次會留港一星期，除工作外，還爭取時間跟昔日好友見面敍舊，她說：「今年二月，我同老公、囝囝返過嚟香港，係我自疫情後第一次返香港，亦係囝囝第一次嚟香港，佢好鍾意，玩得好開心，今次佢嚟唔到好唔開心，所以我唔可以離開佢太耐，我會買玩具畀佢做手信氹佢開心。」

Jocelyn稱雖然在夏威夷生活非常開心，但她視香港為第二個家，一直非常掛念香港的人與物，加上母親的身體改善不少，她計劃之後會更頻繁地來港：「今次舉行工作坊係第一步，我計劃之後一半時間喺夏威夷，一半時間喺香港，希望可以幫品牌做模特兒之餘，同佢哋合作做有關心健康嘅工作，將兩者結合，呢個係我嘅目標。」她預計明年3月會一家三口再度來港。