巫苡萱自爆廁所被裝針孔攝影機　如廁被偷拍擺上網

台灣啦啦隊「樂天女孩」成員巫苡萱，出名樣靚身材正嘅佢，憑直率性格圈粉無數，而日前受邀上節目做嘉賓嘅佢，就透露球場曾被裝針孔攝錄機嘅經歷，由於廁格上下都係鏤空設計，所以有不懷好意嘅人喺洗手盆下方裝上針孔攝錄機偷拍，鏡頭更係對準廁格鏤空位置，將所有女性上廁所嘅瞬間影低之餘，仲喺另一個角度裝上針孔攝錄機，方便後期辨認及剪接，直到影片喺網絡瘋傳，成員先知道女廁被偷裝針孔攝錄機。

此外，巫苡萱更分享道自己某次喺廁所出嚟嘅驚魂記，原本以為身邊企咗位肉感女性，未料對方嘅奇異打扮勾起佢嘅好奇，最後透過塊鏡望過去先知對方竟然係男扮女裝，胸部明顯係假之外，頸同手臂嘅膚色更係差異相當大，雖然最後巫苡萱有搵警衞處理，但等佢哋返去時對方已離去。