陳樂榣玩快問快答　葉泓聲趁機放閃

前女子組合Freeze成員陳樂榣（Ally）與未婚夫葉泓聲（Gordon)一向恩愛，自從陀B後，Gordon更加錫女友錫到濃，Ally晒出一段片，懷有身孕的Ally相當玩得，與Gordon一問一答，對話好笑過真人騷。

美麗孕婦Ally先問Gordon心中將Ally排第幾位？Gordon秒回：「第一位，阿媽第二，阿爸第三。」再問如果她和另一女子同時間傳訊息，會覆邊個先？Gordon表示：「當然覆你先，你最重要。」Ally竟然問：「傳訊息畀你個女仔邊個？」Gordon搞笑答：「我阿媽。」

Ally不放過繼續追問假設性問題：「如果你嘅老婆唔係我的話，但有一日我們遇上了，你會出軌嗎？」這條問題簡直是個大陷阱，Gordon淡定表示：「首先我老婆唔會唔係你，命中注定我愛你囉！」Ally聽完笑到跌在床上。然後繼續問：「你的前度同我邊個靚啲？」無論Gordon如何答，Ally都呷醋男友記得前度的樣子。點知Gordon施冧功表示：「唔記得，你話邊個靚啲，第一個就諗起你。」