范丞丞演技屎上熱搜　木口木面做男三都畀人鬧

內地女神范冰冰細佬范丞丞最近參演爆紅新劇《小巷人家》，入面佢同多位老戲骨同台飆戲，新劇亦係改編自同名小說，自然一開播就吸引大量觀眾，不過佢就突然因為演技問題衝上熱搜。

《小》係講幾個世代嘅家庭、情感糾葛，網友大讚每個人物都表現鮮活，不過范丞丞飾演嘅男三「莊圖南」出場，就被指係畫風突變，因為佢全程麻木，表情僵硬，彷彿成個局外人。當中佢同黃玲合演嘅一場對手戲，黃玲已經眼含熱淚，范丞丞被批成碌木咁，企喺度郁都唔郁，即使係要扮一個沉穩多思嘅優秀學生，都應該有反應。另一場戲係佢同小演員演同媽媽相遇，小演員側頭又滿面擔憂，但范丞丞一臉波瀾不驚，似足陌生人，即被批表演方式令人出戲。

早在佢之前嘅作品中，就多次被質疑冇對作品有足夠重視，今次表現再次令人失望。佢平時喺綜藝上表現生動，個性開朗成日製造笑點，娛樂性同親和力100分。網友表示如果佢要繼續喺演戲方面發展，需要更深入角色揣摩人物心理，用演技去征服觀眾，挽回觀眾緣。