吳若希啜爆餅印細仔賀生日　網友唔畀面：似爸爸多啲

藝人吳若希（Jinny）跟老公育有一女一子，雖然Jinny對住老公相當霸氣，不過面對小朋友就冧滋滋，本月3日是細仔Kylian的生日，她為囝囝搞了一個以蜘蛛俠為主題的生日派對，昨日（4日）她在社交網上載慶生照，Kylian打扮成蜘蛛俠，就連蛋糕都以蜘蛛俠為造型，其中一張相她攬實囝囝肉緊錫錫，她直指囝囝似自己：「我成日都同其他人講，你好似我！但係大家見到你對眼，都話你比較似爸爸...其實搏啜（囝囝乳名）嘅人撇除對眼之外，面形、反應、笑點~都係似我多啲，你哋睇吓對笑笑眼先啦！」

她又大感時光飛逝「話咁快就四歲啦，明明之前見到你仲係好大嚿肉，點解最近瘦咗咁多？長咗咁多？希望你繼續開心地成長，繼續錫身邊嘅人，將來成為一個有承擔有責任感嘅男孩」，不過，唔少網民都話囝囝同老公一個樣，就連蔣家旻都好唔畀面咁留言：「係呀，我都係覺得似爸爸。」唔知Jinny好嬲定好笑呢！