蒙嘉慧欣賞保錡冇藝人包袱：覺得佢有啲粗魯

藝人蒙嘉慧（Yoyo）、吳保錡及陳海寧主持的ViuTV全新節目《呢度住吓 嗰度住吓》在今晚（18日）播出一集中，由近年常居福岡的Yoyo帶着兩人到福岡探索，拍攝當日是保錡留在當地的最後一天，3人大講心底話，Yoyo直言欣賞保錡冇藝人包袱：「佢係一個藝人同小朋友界別中間，我覺得佢未融合到㗎，仲有進步嘅空間，但我又覺得好過癮。第一日開頭覺得佢有啲粗魯喎，但你問我，我自己都唔係好溫柔啦，你話咩人哋啫！佢好願意表達自己唔好嘅一面，好多時冇將藝人身份擺出嚟，但社會責任上，應該有啲榜樣要做，而佢又真係做緊，好似佢搞跑會，希望每一個人都會健康。」

陳海寧表示自己已有兩年冇跟保錡共事：「我覺得呢兩年大家都大個咗好多，但某程度上有啲核心價值，大家都有一齊進步緊，我好開心見到保錡依家咁樣。」Yoyo笑問：「好老懷安慰？」陳海寧聞老字即說：「咁又唔係，佢老啲。」