蔡思貝興奮着偶像袁詠儀同屆旗袍　馮盈盈疑避風頭缺席

港姐出身的蔡思貝、陳曉華、馮盈盈、劉佩玥及莊思明等，將於明晚（19日）無綫台慶夜中，穿着歷屆港姐的旗袍現身。今日（18日）綵排期間馮盈盈突指因家事缺席，未知是否與日前「講英文作狀被狠批事件」有關，所以暫避風頭。

蔡思貝獲安排演繹偶像袁詠儀（靚靚）當年參選時佳麗所穿的黑色旗袍，令她分外開心：「不過如果能夠着到其他師姐嘅旗袍，好似張曼玉咁，我都會好興奮。當年我攞亞軍人哋問我有冇唔開心，我話冇因為張曼玉都係攞亞軍。（有冇見過靚靚呀？）有，我當面講好鍾意佢，佢話得嘞，唔好講埋啲咁嘅嘢，哈哈！」

談到接下來的工作，思貝表示陸續會有安排，但坦言未有劇集拍攝的安排：「會有好多唔同嘅工作，有嘢拍，種種類類啦。（拍劇真係等到望穿秋水喎。）唔驚唔驚，相信個天會有最好嘅安排，希望好似靚靚咁，嚟緊會有好多戲拍。（唔係好似佢咁搵個好老公咩？）我好有事業心㗎。」