台慶︱江嘉敏胸襲紅地氈　林凱恩鄺潔楹聯手抗衡

一年一度盛事《萬千星輝賀台慶》今晚（19日）假將軍澳電視廣播城隆重舉行。為慶祝無綫踏入57周年台慶，今年主題是「同一家人，與你前行」，邀請了接近300位合約藝人及昔日無綫藝人出席。

一眾小花今晚傾巢而出，「四朵金花」江嘉敏以白色吊帶低胸裝現身紅地氈，谷胸效果出奇制勝。同行的鄺潔楹亦不遑多讓，一襲低胸裝現身同養眼。羅毓儀露出纖腰同樣出色，而林凱恩身穿紫色長裙露出香肩。黃美棋中門大開。鄧伊婷大騷長腿搶鏡。

「大騎樓」郭珮文、陳懿德、廖慧儀以及魏韵芝今晚亦齊齊現身台慶紅地氈，一向以身材澎湃見稱的郭珮文今次居然收起性感，只穿一身全黑長袖晚裝上陣，包到實一實，甚無睇頭，令人失望。反之她好拍檔陳懿德就好識做了，Deep V水藍色晚裝，谷胸上陣，事業線深不見底，同時又露纖腰和香肩，相當吸睛。而廖慧儀亦同樣有備而戰，谷胸晒線，真材實料。至於魏韵芝雖亦性感露波邊，但胸下垂顯「八字波」美感欠奉。

陳懿德表示待會踩台板時會換上另一套衣服，且笑謂：「會收埋自己，隆重啲。我入行嘅終極目標就係做台慶司儀，好開心可以打大佬，可以退休嘞！」至於倪樂琳當選數月即獲委以重任，對於自己首次出席台慶且任司儀，她直言有少許緊張：「之前喺後台都有向啲前輩，好似麥美恩咁討教。陳懿德頭先喺咁背台詞，我都叫自己努力啲，而第一次綵排時我都窒一窒，即係叫自己冷靜啲。」