Angelababy求加入《浪姐6》撻Q　新劇遲遲未定檔

女星楊穎（Angelababy）今年被內地娛樂圈解禁後，仍未見有內地工作或影視作品見街，但最近就傳出佢將會參加《乘風破浪的姐姐》第6季，佢仲曾多次嘗試聯絡綜藝節目製作團隊，望能亮相節目成為復出平台。不過尋日（24日）就有Angelababy對接方，代為發文否認：「📣注意，假」即係今次Baby「復出」又撻Q，不過佢嘅粉絲就改為力Sell佢嘅待播劇《漫影尋蹤》、《相思令》，當中《相思令》就見到喺影視平台上架，但就未有播出日期，粉絲就叫大家先預約，等一播就可以即刻收到通知去睇，為偶像嘅事業盡心盡力。