炎亞綸死口唔認萬年緋聞　今高調放閃孭情侶袋

台灣藝人炎亞綸今年8月初復出演藝圈，並於39歲生日當天舉辦音樂會同粉絲同樂，結束後被台媒直擊佢同夥伴一齊打邊爐外，而被爆出係佢嘅交往對象執行經紀兼助理Xuan，亦有陪同。事實上，早喺今年七夕炎亞綸受訪時無預警認愛，雖然未有透露對方身份，但同過往死口唔認嘅態度相比，可謂大不相同。

外貌亮眼嘅炎亞綸出道後緋聞不斷嘅同時，更男女通殺，包括棒棒堂嘅呱呱、鬼鬼、郭雪芙等人外，其中最為人所知嘅緋聞對象非呀本莫屬，2人喺2009年拍攝電視劇《公主小妹》相識，並因感情親密緋聞傳足多年，雖然中間一度傳出炎亞綸太花心分手，但喺2019年阿本再被台媒直擊多次出入炎亞綸屋企。多年嚟炎亞綸同阿本都堅稱對方只係親密好友，直到去年年底阿本晒出自己同圈外男友合照，先徹底結束同炎亞綸嘅緋聞，但仍維持密友關係嘅佢哋，去年炎亞綸被捲入醜聞時，阿本亦一直陪伴。