姜濤「假唱」風波感受辱　晨操目標減10kg

男團MIRROR人氣王姜濤、邱士縉（Stanley）與ERROR成員郭嘉駿（193）今日到電台接受訪問，超過二百粉絲手持各式應援物，一早到電台門外守候。約下午3時15分，3人分乘兩部七人車抵達電台，場外粉絲即爆尖叫，3人落車後先向粉絲揮手，再給記者拍照後才步入電台。

約下午4時30分，3人完成訪問後步出電台，並走向粉絲位置跟大家打招呼、派心心，又接過粉絲送上的禮物及信件，冧爆粉絲，據知因稍後尚有工作，因此眾人只逗留了不夠10分鐘便乘坐七人車離開。

而3人接受鄭裕玲（嘟嘟）訪問，宣傳新劇《無用的謊言》，姜濤直言入行後快樂指數下降，又透露來年有幾個音樂Project，有機會出Album；而減肥亦是來年目標之一，希望多減10kg，現時會早起跑步及跟球隊操練。談及社交平台對他們的影響，姜濤指很多Fans有小朋友，作為藝人有責任傳遞正面價值觀給下一代，明顯回應早前留言斥「床哥」冇品一事；193力撐好兄弟說：「Support you bro.」笑言亦想過留言，但費事「抽水」。

另外，姜濤又重提去年被網民質疑「假唱」的風波，他強調作為藝人不可以假唱：「你唔知道呢樣嘢會令Artist嘅專業性好受侮辱㗎咩？唱得好同唔好係好主觀，但違反事實嘅言論，係好受傷害。」說畢忍不住抖大氣，嘟嘟即掃他背脊安慰。姜濤又寄語大眾看到網上言論要先認清事實，但他亦學懂少講為妙；Stanley則認為辯駁冇意思：「寧願唔講咁多。」