中佬追夢受歡迎　Hey Brother未出道已先火

藝人曹永廉、麥長青、李思捷、黃䝷賢及唐文龍日前被爆組成中佬組合「Hey Brother」，稍後更會推出新歌戰樂壇，消息傳出後引起熱議。據悉，這隊總歲數加起來278歲的男子組今次並非「玩玩吓」，並將於1月10日舉行盛大記者會宣布組團成功，翌日5子更會現身慈善騷站台演出，而年廿九則飛往馬來西亞登台，近日亦已有內地媒體主動邀請他們受訪作介紹，受歡迎程度早已遠超預算。

有指今次組團成功，全因年前阿廉與思捷一次在內地交談時忽萌其想，決定「唔好咁靜嘞，搵啲嘢做吓好」，結果與其他成員一拍即合，但由於打算所有事親力親為，加上要配合眾成員的檔期問題，才會拖延到最近先釋出具體方案摸式。而這亦是阿廉相隔約23年再戰樂壇，談到心情壓力等問題時，他簡單回覆：「冇以前咁緊張，因為今次唔係靠佢搵食嘛，不過知道大家對我哋好關注，坦白講都會有啲壓力嘅，詳情等過幾日再同大家講啦，多謝關心呀。」