大時代賺到笑 散戶慶功談心得
20150421
東網電視
更多新聞短片
一眾散戶收市後到酒樓享用魚翅和鮑魚全包宴。前排右至左為嫲嫲、蘇太、蘇生、葵姐、明姐、趙太、趙生及麗姐；後排右至左為吳生、方生、方太及Grace。
港股大跌後又再大漲，股友近期自然有「斬獲」。雖然股市日升日跌，市場仍面對多項不明朗因素，但一眾散戶一於少理，炒股賺錢後率先「大魚大肉」。記者直擊12位股友的炒股慶功宴，細味股友們的炒股熱情及與良朋慶功的溫情。
一行約10名散戶於收市後齊齊在魚缸出發，包車前往酒樓享用魚翅和鮑魚全包宴。今次活動發起人方先生本月獲利不錯，稱「平時有人炒股賺到少少錢就會喺證券行請大家食燒肉，但今趟人人都賺錢，開心咪叫大家一齊夾份食餐好，最緊要有錢齊齊搵！」
方先生早前持有中國國家文化產業(00745)、寰宇國際(01046)及凱升控股(00102)在短時間內為他贏得5位數字的回報，「我呢啲係小本投資，每隻股平均投資額僅2至3萬元，最後有約25%的回報已經好開心」。
他表示，「平時股友都會約埋飲吓茶、去短線旅行。我覺得炒股都係人生一小部分，賺到錢當然要relax吓，所以叫大家一齊食餐好嘅。」
慶功宴上，平均年紀為50歲以上，大家都有相當的炒股經驗。年紀最大的股友已有83歲，人稱為「嫲嫲」。她說︰「我買股都48年，有咩大上大落未見過。今次港股係咁升都唔驚，平常心面對。就好似有人鍾意打麻雀，我哋就鍾意炒股票，由開市坐到收市，同朋友傾股票就開心。」
「嫲嫲」本月雖然暫時只賺逾千元，但對老人家來說，每日賺逾百元已令她相當滿足，身旁的股友都替「嫲嫲」高興，「之前賺得少啲，但而家日日都可以執幾劑，不知幾和味。」
整個晚宴都歡笑聲四起，股友「開心share」近日獲利戰績，分享低買高賺及多年蟹貨鬆綁的故事，全晚股票冧巴更響不停。
趙太本來手持逾30隻股票，本月牛市讓「倉底貨」終可脫手，故被視為全枱賺得最多錢的股友。她說︰「我揸咗中海集運(02866)、中國遠洋(01919)及吉利汽車(00175)等股票近8年，今輪市場炒航運股合併，我最終可以鬆綁。」
周一股市一度狂瀉，惟一眾股友照舊「無有怕」，淡定依然。趙太指，「就算股市出現回調，我都唔驚，因為我最近都係沽貨多，無高追入貨。」另一位股友方太亦稱，「市況要回一回先叫正常，唔跌反而驚，唔跌吓又點嚟下一個升浪，跌反而畀機會我入市。」
有錢賺開心之餘，席上幾位小股民，亦分享了他們炒股的心得，以及箇中的苦與樂。
方生：專揀首半小時出手
方生是職業司機，習慣睇完市才開工，「股市最重要的時間係開市頭半小時，我會嗰陣做買賣，之後返工。跟住趁食晏時間會再去證券行睇吓個市況，完全無心掛掛，因為每次買任何一隻股之前我都會做足功課。我買的股早前無咩點郁，但近日又炒上。」
方太：周末做功課 專揀騰訊滙控
現職文員的方太笑言：「今個月賺到幾千蚊好開心，我覺得如果返住份工仲賺到額外的錢已經算唔錯。我會星期六、日做定功課，之後就會U盤掛，有時老公會幫忙落盤。我返住工所以玩唔到細價股，會買大隻股，好似騰訊(00700)、滙控(00005)同埋中興通訊(00763)。」
趙太：個心成日去咗證券行
開時裝店的趙太稱：「呢排都無心機喺舖頭，因為證券行同舖頭隔兩條街，有人call我返舖頭就跑返去，之後又跑返嚟魚缸。自己養成咗個心癮，唔係贏唔贏錢的問題，係個心已經走咗去證券行，就算無得贏都要去。」
Grace：炒首長系 贏錢氹孫兒
已退休的Grace直言：「贏輸對我來說不重要，輸的話我就忘記得一乾二淨，贏咗錢我會買衫買玩具畀孫仔。我睇成交量買股票，見大戶買貨我就跟入，成數高啲，所以我輪流炒首長科技(00521)及首長寶佳(00103)等。內銀股之前高位買落，後尾跌落嚟好慘，而家升番上去一定會獲利。我睇27,000點係放貨時機，要鎖定利潤。」
蘇太：贏錢成個月都好開心
家庭主婦蘇太，近期獲利數千元，「成個月都好開心，呢隻又升咗啦，就算自己無買都會打電話畀朋友，問佢沽咗貨未。我哋去行街明明去好遠，但一見到銀行有股票機，我都會入去按吓價，滿足自己的心癮！」
葵姐：成日心思思想入貨
同樣已經退休的葵姐，對股市亦十分投入。「個市升咗成千點，成日都心掛掛，好似個賭徒，心思思想入貨。但自己又無耐性，細價股好多都蝕住走，只係內銀股賺咗少少。」