m18講場：NWB夥美國萬通訂一世保單

日本人出名長命，有百歲人瑞都唔算係咩新聞，但可惜市面上嘅年金保險產品一般都係保到100歲，即係話如果太長命，過咗100歲就無得再拎份年金喇！

所以，剛剛4月初先拎到有限制銀行牌照嘅日本銀行Nippon Wealth Limited(NWB)，就決定搵美國萬通亞洲做partner，事關佢地隻年金夠曬長命，真係保足一世，最適合佢哋班居港日本高端客。

美國萬通亞洲常務董事兼總裁鄭慶藩(KP)就話，佢地隻保一世年金可以話係市場獨有，喺NWB賣咗1個月左右，已經做咗成千萬生意。雖然香港大概只得2萬名旅港日本人，但唔少都係富戶，好似NWB班客1年保費平均供成50萬港紙架!而且日本人最信朋友，一個傳一個下，KP都好有信心可以滲透成個市場，下一步仲可以吸引喺新加坡、泰國等地嘅日本人嚟香港買保險添!