m18講場：扯旗山想上市

依家市況雖麻麻，但「殼股天堂」創業板依然好熱鬧，9月份有成10間公司遞上市申請，其中有間公司，一睇都唔自覺「嘩」咗出嚟，間公司叫「扯旗山有限公司」，主要資產淨得上海兩間「查餐廳」(冇寫錯字，睇埋落去)。

呢間扯旗山今年上半年仲蝕錢，都想係香港搞上市，仲搵埋周中師傅做非執行董事(冇錯，係好多香港人都識嗰位周中師傅)．．．．．成件事唔係拍戲，不過扯旗山創辦人兼主席侯傑輝以前真係做電影製片。

侯主席係香港人，九十年代做港產電影製片出身，09年到上海創業，一共開咗兩間叫「查餐廳」嘅港式茶餐廳，最近喺當地再新開麵館。不過，扯旗山業績似乎就．．．．．．2013年純利700幾萬，2014年唔夠600萬，今年上半年更加蝕77萬幾。

聽啲Banker Friend講，創業板係無盈利要求，只要過去兩年現金流各有2,000萬，同上市市值超過1億，有啅頭圍到飛就得。