孖妹S檔案：3大輪后華麗轉身後 各自各精彩
20151101
東網電視
更多新聞短片
不少輪后淡出輪場，依然過得精彩，生活充實。
輪場音樂椅又再轉動，業界裁員潮一浪接一浪，上星期輪到渣打剁走輪證業務玩瘦身，孖妹知道消息後不禁落寞。之不過，輪證職場輪后輩出，其實有唔少淡出後都活得精彩，我哋孖妹Kitty與彩兒就約咗3位前輪后Girls Talk，睇吓佢哋今期搞邊科！
N：前滙豐環球資本市場財富管理銷售業務上市產品銷售經理許佩琪(Natalie)
孖妹Kitty：冇見你一排，你依家竟然做咗珠寶首飾界嘅達人？仲要唔係「朱義盛」，而係閒閒哋幾卡上落嘅高級鑽石首飾喎！
N：我向來都鍾意畫畫，所以依家做首飾設計。我大學主修會計，碩士修讀國際會計及財務。一大學畢業就入Big Four(四大會計師事務所)做審計，之後仲喺英國滙豐做過，2010年就入咗香港滙豐做窩輪銷售嘅工作，一做就3年。當時離開輪場，係因屋企人身體有事，故要飛去澳洲幫屋企手，打理從事建築材料出入口嘅家族生意，直到生意上晒軌道先返香港。
其實由細到大，受到媽咪嘅影響，令我好鍾意珠寶首飾，因除咗靚之餘，仲可以保值，一代一代傳承落去。上年返到香港，終於可以發展自己興趣，開始設計珠寶，今年仲成立咗一間專為客戶訂製高級珠寶首飾、做原石交易嘅公司添，投資額過百萬元，為咗要客戶有信心，我特意先後讀咗HRD鑽石鑑定同埋GIA珠寶設計課程，幸而，今年內公司嘅營業額已經有過百萬元。
孖妹彩兒：你參選過香港小姐，仲攞過2005年度國際親善小姐名銜添，會唔會親自做Model影宣傳照吸客？
N：公司客源現時主要由家人、朋友一直拓展，亦有唔少係以前喺滙豐嘅舊同事，同埋喺輪場時所識嘅舊客戶，除咗香港，歐洲同東南亞都有客路。寫字樓有一個開放式茶水間，我不時會請朋友上嚟飲吓嘢、傾吓計，好多生意就係咁傾番嚟。
宣傳照方面，如果係急單，又或者係只影手部嘅相，都會親身上陣，不過其他相多數會請型格外籍專業模特兒做示範喇，事關自己形象有時未必太夾。
孖妹彩兒：忙於自己及家族生意，你仲有時間打理個人組合咩？
N：我一向都係長線投資，絕少短炒，目前投資組合有3成資金投放喺藍籌股，旨在收息；有1成資金透過天使基金(Angels Fund)投資初創企業，其中包括互聯網及媒體公司；有3成資金投資物業，其中包括位於中、上環區的住宅、葵涌工廈，以及珠海的住宅物業等；另有3成現金。
-----------------------------------------------------------------------
F：前荷蘭合作銀行股票衍生部助理董事陳芊如(Fiona，前稱陳佩雯)
孖妹彩兒：自從荷合淡出輪證市場後，你好似人間蒸發咁，好彩搵得番你咋！
F：離開荷合後，曾經喺一間上市公司做投資者關係工作，當時要接觸分析員，亦要幫手處理業績公布，好多時都會應對一啲突發事件，份工都幾有挑戰性，學到唔少嘢！喺嗰陣，我開始諗自己嘅人生應該點過，希望做同自己興趣相關嘅工作。
你都知啦，我好鍾意煮嘢食㗎嘛，見到好嘅食材就最開心，咪開始寫Blog分享自己嘅食譜，研究點樣將天然養生食材入饌，仲同烹飪網站合作，近幾星期終於轉咗工，入咗朋友從事保健食材生意嘅公司——鑫億國際擔任營銷總監，依家日日對住西藏冬蟲夏草、青海黑枸杞呢類產品，雖然人工唔及做金融界咁高，但卻增添唔少正能量。
孖妹Kitty：放棄輪后身份，第日咪好難見到你？
F：隨住衍生產品需求下滑及式微，市場不斷收縮，我都冇刻意要重返輪場。家人係廚藝高手，細細個我就喺廚房門口偷睇媽咪煮飯，大個咗就開始跟大師傅上烹飪堂，連去泰國旅行都要上堂學煮泰國菜，以前都有考慮過搞私房菜，礙於香港租金同人工太貴就打消念頭。近年鑫億銳意擴張生意，希望不久嘅將來可以扶助佢上市，現時我正密謀推廣公司產品，唔排除第日會做埋Youtuber，哈哈！
孖妹彩兒：每日由對住輪證，變成對住食材，返工習慣嗎？
F：我讀工商管理出身，畢業後做投行行政助理，2006年加入荷合，初時做行政工作，2008年先轉過去衍生部工作，當時任職衍生工具部，除咗要熟悉公司產品外，亦要留意競爭者產品，若有牛熊證打靶，更要適時補充迎合市場需求嘅產品，仲不時會落證券行探散戶、搞講座；其實依家嘅工作性質同以往都幾似，我每日都落門市認識產品，勤力「做功課」，且客戶多數係媽媽級，同以往對開嘅散戶年齡層差唔多，都尚算得心應手。
-----------------------------------------------------------------------
R：前渣打股票衍生及中介銷售部窩輪銷售董事林燕玲(Ruby)
孖妹Kitty：離開渣打之後，你有冇打算任性咁放1個悠長假期？
R：我冇懶散㗎，照舊7點幾起身，有行家教落，要寫低自己喺轉工期間每1日做過啲乜，好似人哋流落荒島咁，等自己冇咁易迷失。依家當然係做盡之前番工做唔到嘅事啦，好似做運動、約朋友見面，同行家傾吓偈，正因剛去過美國旅行2星期，暫時未想再飛住。
R：其實跑步係我個人興趣之一，如果感覺到流汗、操到體能Fit咗，我就會好有滿足感！喺1年前我習慣1星期跑1至2次步，但係番工係開8放7左右，放工後已經好攰，所以Keep唔到，依家咪趁機會Pick Up番，仲可以一起身就落街跑、曬吓太陽，唔使好似以前跑跑步機，不過目前仲好渣啊，每日只係跑到5至10公里咋，希望下年可以參加馬拉松賽事啦！仲有啊，我仲好鍾意一樣好刺激嘅運動——泰拳，一旦體能好番都想再玩。
孖妹彩兒：你會唔會重返輪場，有冇人向你招手先？目前有乜打算？
R：我非常熱愛工作，呢幾日我都係度諗，其實我撇除渣打個銜頭仲有乜價值，未來我都想繼續喺金融界發展，暫時冇特定範疇，正在發掘同探索身邊嘅合作機會，都開始睇緊有冇適合自己同有前景嘅機會，但係就未有驚天動地嘅計劃。最確定嘅係，我唔會走去讀Master，不過就好想學習一啲完全同工作無關嘅事，例如以前有學過嘅德文。
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like