m18講場：被逼做到76歲先有得退休？

大家可能聽過IQ、EQ，但又知唔知咩係RQ？RQ者，「退休商數」也，係AIA MPF用嚟量度港人退休理財諗法嘅指標，當然愈高分愈叻叻，老咗唔使食穀種。不過，香港人RQ原來好多都係「僅僅合格」，原因就係太錫啲仔女囉。咁你又係唔係咁呢？不妨去我哋「東網Money18」fb專頁 http://www.facebook.com/money18 度留言表吓態啦。

嗱，講番個調查先。話說AIA最新調查發現，在職港人平均RQ得63分(得分由10至100，高過75算高，低過60為低)，仲有三成人直頭肥佬唔合格(即低過55)，即係儲唔夠錢退休，平均退休時間要延遲11年。就咁嘅，熱愛工作自己選擇做落去一回事，唔夠錢被迫做到76歲就......

點解港人RQ咁低? 皆因一身兒女債！ 有87%受訪家長話，放喺子女興趣班嘅開支，仲多過自己退休儲蓄；有80%家長仲話要畀仔女最好，搞到忽略咗自己個人退休需要。

前主播趙海珠(珠珠)係周一呢個調查發布會司儀，講到家長苦況，珠珠都話自己好理解，事關佢亦係一子之母兼仲有個囡囡嚟緊，佢平日淨係幫三歲囝囝簽學校通告，都已經用咗唔少時間，仲邊得閒諗退休！都未計有時見到靚靚水壺仔又買，鞋仔衫仔又買。不過咁，珠珠RQ都有64分架。

廿四孝家長究竟可以為仔女去到幾盡？ 調查見到，喺入不敷支情況下，家長就算借錢，都唔會減仔女課外活動。惟有講句「孝感動天」！諗住將來退休靠番仔女照顧？諗吓好喇，事關有18%受訪90後原來好唔志在，竟然從來未睇過一眼自己個MPF戶口，分分鐘要你幫手儲埋佢第日退休個份。

想啲仔女生性？不妨畀啲參考你睇吓，原來RQ最高嘅三個地區係港島南、中西區、油尖旺；最低RQ就係深水埗、新界北、屯門。你當然可以諗吓做「孟母」，但實情不如以身作則，首先將退休儲蓄視為每個月首張必付帳單，係仔女面前做好理財榜樣，咪仲好。

─ ─ ─ ─ ─ ─ ─ ─ ─ ─ ─ ─

「東網Money18」fb專頁：有討論、有分析，齊來FUN享，贏盡●你Like