聖誕出走：買旅遊保險 有3點要搞清楚
20151206
東網電視
更多新聞短片
旅行要玩得放心，出發前記得買旅遊保險。
踏入12月，相信唔少人會趁聖誕節假期去旅行，本網站會一連3個星期，就準備出門既你，提供旅遊保險、信用卡海外簽帳，同匯兌既小貼士，今日會率先同大家講講旅遊保險，趁仲有少少時間做功課，臨上機前揀揀邊個plan最適合自己！
1.旅遊保最緊要睇醫療保障
萬一出國整親，醫療費用一定甘過普通財物損失，如果要住院仲分分鐘要花幾十萬，所以一定要睇清楚醫療保障範圍。
其中最重要就係睇保單有無包括全球緊急醫療運送服務，因為呢類服務收費可高至過百萬元，如果此部分賠償包括在醫療保障總額上限之內，就變相未必夠賠其他醫療費用，所以最好選擇兩者分開計算賠償額的保單。
另外，部分旅遊保其實可保回港後的覆診費用，但投保人要緊記，即使拗柴都千祈唔好掛住玩，打算番香港先睇鐵打，事關投保人必須要先於當地睇過醫生，證明受傷的嚴重性，保險公司先會受理回港後的覆診費用，所以旅遊受傷第一事件要睇當地醫生，並且keep好醫生紙同收據。
2.財物保障有最高賠償額
旅行被人偷野唔係新鮮事，雖然大部分旅遊保險都有提供個人財物保障，但前提係大家要第一時間去當地警局報失，拎埋口供紙先可以claim! 至於損失嘅財物，都同樣要出示單據保險公司先受理。
大家亦唔好諗住所有野都可以claim足，因為保單會設定一個最高賠償額，大家要衡量保障金額足唔足夠。
3.自駕遊記得向租車公司買汽車綜合保險
如果大家打算自駕遊，就千祈唔好以為買旅遊保就夠，如果自駕發生意外，旅遊保其實只賠償到投保人受傷的醫療費用，至於意外中導致他人受傷，或者撞爛人地架車，就要透過第三者責任險賠償。
租車公司其實一定有汽車綜合保險賣，所以無須周圍搵，但各地法例始終不同，最好出發前預先聯絡當地租車公司，了解一下保單條款先!
最後一句，其實旅遊保保障唔只覆蓋旅遊期間，旅遊前因意外取消行程，或者旅遊後回港覆診，其實都可以受保，所以book好機票酒店就已經可以買保險啦！
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like