30歲就做個有錢人?你都得架!

[16:44] 20/01/2016
東網電視
更多新聞短片

20幾歲讀完大學,帶住一身Grant Loan債,就算唔係經常大出血,都總係月月光,甚至入不敷支?點解人哋30幾歲就成為有錢人?秘訣喺邊?跟足以下10個法則,盡早調整心態,30幾歲左右就做個有錢人,絕對唔係奢望。嗱,再講清楚,唔係嫁/娶個有錢人,係「做個有錢人」呀!

─ ─ ─ ─ ─ ─ ─ ─ ─ ─ ─ ─
1、儲錢投資 滾大本金
能盡快致富,一定唔係單靠打份工,而係盡早投資。儲錢唯一原因係用來投資,而非為儲而儲。緊記將非緊急錢擺喺投資戶口,每年至少檢討該戶口兩次。

2、搵有錢人 做你師傅
要突破基層眼界局限,就要靠學,搵啲成功有錢人做自己師傅。邊到搵?成個東網《致富智庫》任你睇。

3、借得其所 加大籌碼
借錢並非大忌,大忌在於不能錢變錢。若要借錢買車(供樓供車一樣算係借),架車一定要幫到你搵錢,否則唔好借。有錢人就係懂得利用借貸來玩槓桿,加大賺錢籌碼。窮人係借錢享受,富人係借錢再錢搵錢。

4、你不理財 財不理你
要將錢當作係會呷醋嘅男友女友,你着緊佢,佢先會着緊你;你若對佢冷淡,佢亦唔會對你熱情,甚至飛甩你。記住將佢放在最重要位置,關心佢、呵住佢。

5、天道酬勤 肯捱肯做
人人7點收舖,你肯做到11點,肯定多啲生意。聰明與運氣,未必想有就有;但勤力,你實做到兼包有回報,正所謂「天道酬勤」。

6、「天生窮」唔係藉口
微軟創辦人蓋茨講過:「如果出身貧苦,唔係你嘅錯;但如果你死於貧窮,咁就一定係你自己嘅錯。」

7、唔使炫耀 學慳字訣
成功人士係直至生意或投資帶來多元化收入後,先會「獎勵」自己名錶名車。「慳字訣」係你必須要培養的。

8、錢做槓桿 錢再搵錢
做有錢人,要識玩槓桿,即係投資,唔好淨諗住靠份人工,亦唔好齋諗住靠儲。買股票、買樓收租都係投資。啲搵錢嘅粗重嘢,等啲錢去幫你做。

9、定高目標 走得愈遠
想得太細會限制你嘅機會與發揮。目標不妨Set高啲,呢個世界多的是錢,缺嘅係敢有大想頭嘅人。

10、追住啲錢 增加收入
要追住啲錢,換言之係增加收入。成功人士往往係及早追住啲錢,只要不斷諗住要為財富增值,錢就會引領你。戒咗「金錢萬惡」、「貧亦樂」呢幾句,遠離啲仇富嘅人。

─ ─ ─ ─ ─ ─ ─ ─ ─ ─ ─ ─
呢10個法則,Work唔Work?當然Work啦!唔係一味靠吹架,有人辦你睇。

●人辦一:80後人氣Blogger Starman

成績:以投資工廈,30歲前已經賺咗人生第一桶金;依家財務自由,每月嘅被動收入(即是坐喺到收息之類)係6位數字。

佢認為最Work係:
1.「增加收入」及「錢做槓桿」
Starman指,儲蓄會被通脹蠶食,收入來源單一易受經濟環境影響,「以做銷售員為例,零售市道轉差,或要減薪或裁員」,所以打工仔應作多類型投資(如股票、債券、房地產),賺取被動收入,兼分散收入來源。

2.「肯捱肯做」
佢話,初入職場屬投資期,投資在自己身上,累積工作經驗、建立人際網絡好重要,切忌怕蝕底。佢自己當年初畢業時亦超刻苦,試過一日連做20小時,返屋企小睡一下就返公司搏殺。

3.「天生窮唔係藉口」
Starman自己亦係基層家庭出身,憑專業投資知識打出頭。佢話香港機會處處,出身貧窮唔代表冇機會。

●人辦二:中原資產管理高級副總裁黃安盈(Kristy)

成績:30歲前已成功累積第一桶金

佢認為最Work係:
1.「增加收入」及「儲錢投資」
Kristy話,經濟差,打工仔有機會失業,「所以千祈唔好一世靠份工,創業唔多人做到,但儲錢做投資相對易」,初出社會工作5至7年慳住使,之後投資彈性大好多。將月薪平均分三份:一份做日常使費;一份存銀行應急;一份放投資戶口或月供基金,等候好時機置業。

2.「訂高目標」
Kristy認為目標定1,000萬好合理,「又不妨試諗吓,10年後想住邊類單位?1,000呎私樓?或係獨立屋?並以此為目標。」此外,心態與堅持同樣重要;啲只識吃喝玩樂嘅朋友,割席算,要為遠大目標狠下心腸。

─ ─ ─ ─ ─ ─ ─ ─ ─ ─ ─ ─
想領悟更多理財智慧,富足一世?即刻click入「致富智庫」
http://bit.ly/1QWtuLg

「東網Money18」fb專頁:有討論、有分析,齊來FUN享,贏盡●你Like
http://www.facebook.com/money18