m18講場：蔡太85歲大壽勁風騷
講到堅，真係要數「股壇大姐大」蔡陳葆心同佢老公。蔡太最近85歲大壽，但一啲都冇現老態，喺中華總商會擺咗四圍賀壽，一向貪靚嘅蔡太，當日更揀咗套黃色小鳳仙裝慶祝生日。佢成班老友記，好似周文耀夫婦、許照中夫婦、李君豪等齊齊到賀，蔡太興奮得全場飛。
蔡太老公仲勁，今年94歲，老如松柏，佢哋阿仔蔡思聰仲爆老竇養生之道係「從不戒口」，每個星期有5至7日食膏蟹，換言之，差不多日日無膏蟹不歡。佢老人家更加鍾意食肥豬肉、同雞Pat Pat等，但完全冇「三高」(高血糖、高血壓、同高膽固醇)，真係羨煞旁人。
佢老人家仲有一樣令人羨慕到不得了，就係佢塊面到依家仲係漲卜卜，完全唔使做乜Facial打botox。唔通佢食得肥豬肉多，有足夠骨膠原？
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like