3字頭住無敵海景？　5張圖孖你睇最平價

東網電視

後生仔有邊個唔想有個日日對住無敵海景嘅安樂窩，但若然自問唔屬於「人生勝利組」，即係冇個富爸爸，同你畀首期兼供間海景戶的話，想日日返屋企對個全海景，就一定要靠自己。

其實，就算冇「父幹」，想平住海景樓都唔會係好「離地」啫！除咗要努力儲首期，識得入手亦係重點。青山公路及屯門碼頭一帶公認係全港最平價海景盤集中地。睇晒5張圖，就可以一次過了解呢啲至平海景盤嘅入手價。睇完就會即刻講句「我都做得到」啦！

講到銀碼最平嘅海景盤，一定要提黃金海岸對出嘅龍珠島，四面環海，都幾有世外桃源Feel架。島內嘅龍珠島別墅最平3球有交易，不過只係開放式單位，實用面積280幾方呎，夠唔夠住就見仁見智喇。

不過，事先聲明，住得呢度就預咗位置隔涉，打工仔唔想返工遲到就要早啲出門口囉；仲有打風日子隨時有家歸不得，真係唔好唔注意呀。

「3字頭」海景盤仲可以揀位於青龍頭嘅豪景花園，背山面海，最貼海嘅1期提供飽覽無敵海景嘅2房盤，實用面積300幾方呎，而家最低消費330萬元，喺市區買個劏房盤都未必得，算唔算係窮人恩物呢？

若然Budget充裕啲，屯門碼頭一帶係另一個可考慮嘅位置。好似臨海嘅邁亞美海灣，除咗充滿度假氣息之外，行兩步有輕鐵站及商場，衣食住行算係方便。而家2房海景盤最平383萬元可做業主。

追求空間夠大嘅居所，就要放眼鄰近屯門嘅青山灣，呢帶樓價出名低水，最平可揀出入要行條斜路嘅海景花園，380萬元可買個2房海景戶，實用呎價只係6,500餘元，平通青山公路海景盤。個單位實用面積有近600方呎咁多，剩係個巨廳已大過唔少市區細單位。

─ ─ ─ ─ ─ ─ ─ ─

香港樓市日日新鮮，話題多多，想睇晒最update嘅樓市新聞短片，即刻click入 http://bit.ly/1M2kP95

樓市轉勢，癲價時代告終，上車客、換樓客終於迎來入市機會，今年「真的上車了」！ http://bit.ly/1zZzAUd

on.cc東網