即睇！5招幫你Keep到晏晝都有能量

東網電視

返office，每逢去到下晝就覺得特別難捱。(Getty Images圖片)

下晝兩、三點啲鐘數最難捱，食完Lunch開始飯氣攻心，但仲有半日先收工。想瞓個晏覺補補精神？但你又唔係內地人或者歐洲人，那有這些機會呢？不如睇睇以下5招，等你Keep住晏晝有能量，起碼可以有番「3格電」頂到放工，唔使釣魚釣到跌落水。

=============

1、高纖早餐

高纖維早餐可以今人長時間Keep住有能量。想Hip啲？可以試奇亞籽（Chia Seeds），高纖兼高蛋白質，將奇亞籽加水，放入雪櫃雪過夜，第二朝拎出嚟加啲Smoothies。怕太寒？麥片加果仁與各種莓，一樣好高纖。

2、多菜午餐

專家話，午餐應該有一半係蔬菜，但唔好忘記蛋白質，食沙律嘅，可以加多杯紅豆或扁豆，加啲南瓜籽又得，可以增加Energy。糖、白麵包、糕點呢啲，食少啲可以更提神。

3、三點三Nuts

又到三點三，下午茶時間。講到小食，又係Nuts（果仁）出場，果仁有齊蛋白質、脂肪同鎂，缺鎂人會覺攰。果仁首選係腰果、杏仁、同榛子。又或者切塊蘋果或者梨，點下杏仁醬；或切半個牛油果，點少少鹽同紅椒碎食。未試過？就要試吓喇。

4、補水要緊

唔淨止塊面，身體補水一樣好要緊！缺水嘅話，唔止好Dry，仲會冇晒Energy。嗱，沖咖啡之前，不如先飲杯水好過，又或飲杯綠茶，綠茶少啲咖啡因又抗氧化。不過，最好都係水。

5、起身走走

飲飲食食嘅貼士講晒，其實最實際係應該起身行吓。唔係原地行，至少行到望唔到自己張枱！依家乜都講Multi-Tasking，咁其實消耗大家好多能量，起身走走，畀個腦休息，就好似手機開得太多Apps，部機會慢過人咁。熄晒佢，一陣先再搏殺過啦！

─ ─ ─ ─ ─ ─ ─

「致富智庫」領悟理財/職場智慧，一Click改變一世

「東網Money18」fb專頁：有討論、有分析，齊來FUN享，贏盡●你Like

on.cc東網