Intern篇(上集)：上位15簡易招

東網電視

一年容易又……到實習季節！做緊或者即將做Intern(實習生)的你，是否好期望喺份實習工度學到嘢、攞下經驗，再整靚啲份CV？有冇諗過，實習分分鐘可以變長工。想快人一步搵到份長工？實習點至上到位？睇睇以下15招，超易，堅有用。

話時話，呢15招，何止Intern合用，剛剛返新工的你、初出茅廬的你，亦一樣啱使。

========

1、開工前做足功課

面試前都會做足準備去了解吓間公司，咁冇理由返第一日工之前，唔做啲功夫嘅。所以，之前嗰晚，唔該重溫一吓間公司嘅資料，了解吓個行業、甚至係你嘅老闆，Search埋公司最近有咩新聞就仲好。功課做足，開工第一日包你自信兼突出。

2、當正職嚟做

希望上司認真咁對待你？咁首先你都要認真咁對待份工。記住，入得間公司做，無論係咩職位、無論人工幾多都好，你嘅貢獻(或錯誤)都會影響到公司與同事，所以唔好睇小自己嘅重要性。

3、人靠衣裝

預先打聽公司環境同風氣係點，打扮要配合番。記住，要着到好似你想上嘅位，而唔係你做緊個位。寧願做實習生當中打扮得最好嗰個，亦唔好Casual咗。着得好，係點都唔會蝕底嘅，唔單止畀人個好印象，仲會影響埋你點樣睇自己添！

4、備多套衫

擺定多套衫、一條呔、或一對高跟鞋喺公司，事關你唔知幾時會被「臨危受命」，要出席啲重要會議或酒會咁。仲可以畀上司睇到你幾有準備、有能力面對突如其來嘅情況。

5、唔識要問

一個人唔會識得晒所有嘢，唔好怕問，人哋反而會覺得你願意學習。不過，問過嘅嘢，唔該好好記住，咪問完又問，令人煩之餘，仲會覺你冇心工作。

6、管好時間

做實習生，會有好多人畀嘢你做，記住唔好一次過攬太多嘢上身。真係做唔切，要提早同人講，千祈唔好死頂，然後又趕唔到Deadline。

7、靈活適應

唔同公司、唔同嘅人，都有唔同嘅做事方式與溝通方法，你要學會適應，咁先會有更多機會。

8、帶眼識人

雖然實習係一個擴闊社交、人際網絡嘅好機會，但亦要保護自己，唔好毫無保留咩嘢都話晒畀人知。

9、建立人脈

唔係齋Social或吹水，而係與同事建立更有質素嘅關係，多啲人識你，你轉全職就更大機。

10、拜師學藝

唔好怕醜，試吓搵你嘅上司，或你覺得好掂嘅同事食餐晏，向佢哋請教，聽吓佢哋嘅經驗。你敢問，就有得學。

11、進取之餘亦要聽指引

自告奮勇係好，但千萬唔好樣樣都爭嚟做，做好一、兩樣嘢，好過孭得多Job但冇樣妥。仲有，就算幾有自信，做實習都係嚟學嘢嘅，所以要聽人哋有經驗嘅指引。

12、唔好畀人搵笨

每個Intern或新人，都預咗要欣然咁去做一啲好悶但又必須嘅嘢，但若然發覺自己畀人搵笨，一定要識拒絕，你係嚟實習，唔係嚟做水魚。

13、挑戰自我

不妨試啲自己未做過嘅嘢，好好利用實習機會，嚟學習及鍛練行內技能，豐富自己嘅Portfolio。

14、記低工作成果

記錄低實習時處理過嘅實際事件或數字，以便日後求職時，畀人具體了解你嘅工作表現。

15、主動問成績

實習期結束，未必一定有正式報告反映你嘅表現。所以，要主動定時問吓他人意見，了解吓自己嘅工作表現到底如何，咁先可以睇清自己嘅強項與弱項。

=============

睇咗以上15招，好想即刻試吓Work唔Work？唔使急住，話明呢篇係上集，即係仲有下集啦！嚟緊嘅係《Intern篇(下集)：15條死罪》，睇埋有邊15樣錯，Intern一犯，睇怕唔使旨意有得番轉頭。

-----------

「致富智庫」，領悟理財/職場智慧，一Click改變一世

「東網Money18」fb專頁：有討論、有分析，齊來FUN享，贏盡●你Like

on.cc東網